خرافات .. احنا جينا ازاي؟؟

بقلم: هالا عبد الفتاح | من موقع: "فكِّر تاني"

 

بمناسبة حملة خرافات على موقع "فكر تاني" لما قريت الهاشتاج جه فى بالى مواضيع كتيرة جدا ممكن اتكلم عنها اتضحك علينا بها كبنات و احنا صغار السن زى الدورة الشهرية و فض العذرية (غشاء البكارة) و ركوب العجل و تاثيره على الغشاء او الرغبة الجنسية , احنا جينا ازاى من بطن  ماما ...

و عن احنا جينا ازاى من بطن ماما و اىه علاقة بابا بالموضوع و السؤال اللى سالته لاهلى فى خلال مرحلة الابتدائى و كنت وقتها فى مدرسةالراهبات الفرنسيسكان و هى مدرسة محافظة فا كنت بخاف اسال فى حصة الدين عن حاجة مع ان علاقتى كانت ودودة  الا انى كن بخاف من المدرسات ان اسأل اسئلة زى دى Ma soeur  جدا مع

كحال كتير من الاطفال من جيلى كنت بشوف الافلام الابيض و اسود على القناتين الاولى و الثانية و كانت اغلب الافلام رومانسية كنت بشوف القبلات المتبادلة بينهم فى الافلام بين فريد الاطرش و سامية جمال بين شادية وصلاح ذو الفقار بين عبد الحليم و مريم فخر الدين فكنتت اسال ماما اىه ده تقولى ما بيعملش كده الا المتجوزيين قلت لها طب و الست من البوسة دى هتحمل منه تقولى اه فاخض و اقولها بس انا بشوف افلام كتير بيوسوا ممثليين مختلفين بيحملوا من كل دوول ؟! فما تردش و احيانا تقولى لا ما هو ده مش قبلات ده  هما بيركبوا الوشوش على بعض فى المونتاج لكن مش بيوسوا بعض فى الحقيقة ....

 

انتقلت لمرحلة الاعدادى و مازالت مش متفهمه حقيقة احنا جينا ازاى و ازاى البوس بيخلى الست تحمل فى طفل و الافلام مليانه بوس 

فى اولى اعدادى فى حصة الدين كانت بتشرح فى اىه من سورة المؤمنون الاية الكريمة ( ثُمَّ خَلَقْنَا النُّطْفَةَ عَلَقَةً فَخَلَقْنَا الْعَلَقَةَ مُضْغَةً فَخَلَقْنَا الْمُضْغَةَ عِظَامًا فَكَسَوْنَا الْعِظَامَ لَحْمًا ثُمَّ أَنشَأْنَاهُ خَلْقًا آخَرَ ۚ فَتَبَارَكَ اللَّهُ أَحْسَنُ الْخَالِقِينَ)

كان شرح المدرسة للاية ان الام و الاب اما بيناموا جنب بعض جسمهم بيعرق فالعرق ده اما بيحضنوا بعض بيختلط ببعضه فالام بتحمل !

روحت البيت و قلت لماما وبابا مس الدين قالت ان احنا جينا عن طريق انكم حضنتم بعض و انتم عرقانين فماما حملت فيا فضحكوا ..... وبس 

اما وصلت لمرحلة 3 اعدادى وصلنا فى دروس العلوم لشرح العضو الذكرى و الانثوى فكان المدرس رجل فى الحصة دى جت لنا مدرسة سيدة و حقيقة الامر انها شرحت الموضوع من على الوش انا مافهمتش اى حاجة و كنت باخد درس خارجى فماما قالت لى تحبى تحضرى الحصة دى و لا هتخجلى ففضلت ان ماحضرهاش.

اما وصلت ثانوى ما عرفتش الحقيقة كاملة الا من صديقاتى البنات اللى فى ثانية ثانوى كانوا مخطوبات و فى ثالثة ثانوى كان منهن عند اتمام الل 16 عام تزوجن..

اكتشفت ان القبلات و الاحضان  ما بيسببوش حمل و عرفت شرح الاية الكريمة  ان النطفة خليط من ماء الذكر ( الحيوانات المنوية )  و ماء الأنثى ( البويضات )  أثناء عملية الجماع ( الجنس ) 

و شرح الاية الكريمة وقتها جبته من على الانترنت لخجلى ان اسال حد و عشان اعمل مقارنة بالكلام اللى سمعته من صديقاتى عشان اتاكد من حقيقة حكيهم ....

السؤال اللى بطرحه امتى هيبقى فى المدارس تربية جنسية لتثقيف الاجيال القادمة لتوعيتهم بجسدهم لتجنب حالات مرضية موجودة عند البعض بسبب الجهل بالامور الجنسية كما ان التوعية الجنسية هتحد من الاعتداءات الجنسية  و التحرش  و هتخلق جيل واعى اكثر من جيلنا بجسده و عارف يحميه من الامراض الجنسية و عارف ازاى يتعامل معاه  وعارف امتى بيكون بيعتدى عليه و بيتم التحرش به  و على الاقل مش هيكتسبوا معلوماتهم الجنسية عن الزواج و العلاقات من خلال الافلام الجنسية اللى بتبس افكار و معلومات خاطئة ... و قبل كل ذلك يجب عمل جلسات توعيه للابهات و الامهات لتعريفهم بالمادة والغاية من تدريسها والتاكيد على ان هذه المادة لا تحفزهم على ممارسة الجنس و التاكيد على ان  محتوى الدروس ليست منافية لثقافتنا أو لديننا .

بمناسبة حملة خرافات على موقع "فكر تاني" لما قريت الهاشتاج جه فى بالى مواضيع كتيرة جدا ممكن اتكلم عنها اتضحك علينا بها كبنات و احنا صغار السن زى الدورة الشهرية و فض العذرية (غشاء البكارة) و ركوب العجل و تاثيره على الغشاء او الرغبة الجنسية , احنا جينا ازاى من بطن ماما...