بقلم:هادية عبد الفتاح | من موقع: "فكِّر تاني"

كست مصريه أقدر أقول أن ببساطه أن الكيس الاسود بيمثل عامل مهم مفروض  فى حياتنا مش عشان تتحط فيه الزباله لاسمح الله ، لا عشان اى حاجه خاصه بجسمنا لازم تتحط فيه عشان بيقولولنا عيب.

يعنى مثلا   لازم وحتما ولابد اما نروح اى صيدليه نشترى، الفوط الصحيه لازم بيحطوهالنا فى كيس أسود، وتلاقي الراجل اللى فى صيدليه بيدهالك وهو بيبصلك بصه غريبه وكأنك بتأخد منه مخدرات، و كمان لما نروح نشترى ملابس داخليه بيحطوهلنا فى كيس أسود و كمان البابي دول بيحطوهالنا فى كيس اسود، ولو فكرت تسأل اى حد ليه بتتحط الحاجات دى فى كيس أسود يقولك عشان الرجاله متشوفهاش.

الغريب بقي ان لما تروح الاسواق الشعبيه فى اى محافظه فى مصر تلاقي الرجاله هما اللى بيبعوا الملابس الداخليه لستات، و تلاقيه واقف يقولى الكلوت الحريمى بسبعه ونص وتعالى بص، ممكن يبقي ماسك كمان ميكرفون و بيقول في، و بيقول اسعار.وبيدلع  الملابس الداخليه «الكلوتات» وبيوصف الوانها واشكالها، الكلوت اللى بريش يا مدام عشان تشخلعى الايام، الكلوت الجنان اللى بيخلى حياتك ألوان، الكلوت اللى بيغنى اه يانا عشان يخلى جوزك يرقص.

الرجاله بيبعوا الكلوتات والسوتيانات من غير اى كسوف، وحتى لما نقف نشترى منه تلاقيه بيقولك بصي يا ابله انتى مقاسك كذا وكانه هو الخبير العالمى فى مقاس  الكلوتات  والسوتيانات و تلاقي ايفيهات بيقولهالك خدى طقم كلوت وسوتيانه  شاكيرا ولا طقم نانسي عجرم و كمان بقي البابي دول تلاقى البياع عامل فيها خبير الليالى الحمرا و هبه قطب فى نفسه و فى اسماء للبابي دول ، زى فايجرا و القطه الشرسه واسماء كتير 

وكل ده بينتهى بكيس اسود بردوة عشان عيب حد يشوف، طب ايه التناقض ده يا جماعه، منين هما عيب وبيتحطوا فى كيس اسود عشان ما يشوفهومش رجاله ،ومنين اللى بيبعوها هما رجاله فى نفس ذات الوقت، لاسف احنا عايشين وسط تناقض غريب ومش مفهوم.